La Zurema la zera la fiola pi vècia. La gavea belche passà via i vinti e sìnque ani e no la zera bona de catarse fora el moroso.
Un sabo, ghen’era el baile ntel salon dea ciesa e so pare e la so mama i ze ndai de acordo de dassar che la fiola la ndesse a sto baile, onde ghe zera i fabricieri che i ghe tendea par che qualche dun no’l fesse stravaganse e anca par veder se la Zurema la se catesse sto moroso par despaciarla fora de na volta, intrà che i ghin’avea nantre quatro fiole par maridar. Ma come la mama la ga sempre bio na preocupassion che le fiole le se maridesse vèrgine, la ghe ga parlà de incontro al so omo:
– Varda, vècio, mi cato che par la Zurema ndar al baile ntel salon dea ciesa no ghe ze poblemi, ma par star fora de tute le preocupassion e par esser sicura, mi go pensà de pintar na colombeta ntele braghete dela nostra fiola, e quando che la vien casa del baile, alora ghe dao na ociada e vedo se la se ga comportà de acordo.
El vècio el ga visto che la so dona la zera pi furba de quel che lu el pensea e el ze restà contento.
Dopo che la mama dea Zurema la ga pintà la colombeta ntele braghete e che la ghe ga dato na mùcia de consìlii e che la ghe ga spiegà a la fiola par che che la ghe gavea pintà sta colombeta e che la stesse su cole récie, el pupà e la mama i ze ndai dormir pacìfichi e la fiola la ndata al baile contenta che mai.
Quando che la Zurema la ze rivada casa del baile, ale tre dea matina, la so mama la ze saltada su de leto de colpo e la ze ndata parlar cola fiola:
– E alora, fiola, son qua premosa par saver come zeo stà el baile? Te galo piasesto?
– Anca massa, mama. Go mai passà na note compagna. Ben, go balà tute le mùsiche che son qua fin intrigada de star in pié.
– Si, ma te gheto comportà de acordo come che gaveino combinà?
– Ah, volio che, mama. Savì ce i tusi de incoi no i ze mia come ntel vostro tempo.
– Come cossita, fiola?
– Ah, ghin’è stà diversi che i me ga strucà robe che i me stofegasse intanto che balàvino. E ghen’è stà un che el me ga fin menà là fora rento ntel so sevete.
– Maria Santìssima, fiola. E galo smissià anca ntea colombeta che a mama la gavea pintà?
– Nò, nò, mama! No sté preocuparve, pamor de Dio! Come te me gavei racomandà, ghe go mia assà che el metesse e man ntea colombeta. El ga sol sfrugnà ntel gnaro, mama.
Figura Dela Stimana
Da ani indrio, no ghen’era mia cresse come el giorno de incoi. Squasi tute le fameie le laorea in colònia. Alora, quando che i gavea i tosatei pìcoli e che i ghe tochea ndar laorar, i mitea el tosatel rento nte una sesta de taquara e lo menea in colòlia. Quando che i rivea là ntela rossa, i postea la sesta nte na ombria, soto na pianta e i ndea laorar. Magari, cada ora, o cada mesa ora, la mama la ndea là par veder se el tosatel stea ben e la ghe dea de ciuciar. I conta che, tante volte i scoltava el tosatel drio pianzer, o parché el gavea fame, o parché el zera pien de moschiti o formighe. Cossita la zera la vita in colólia de sti ani.
Sol par rider
Stimana passada ze caisto un avion pien de polìtichi nte una fasenda, là su a Mato Grosso. El paron dea fasenda el ze rivà là par veder cossa che gavea sucedesto e quando che el ga visto tuti i tochi del avion strassinai in volta, squasi che el ze deventà mato. El ze ndà casa a tuta a carera, el ga ciapà el trator el ze ndà là, al ga fato un buso grando e el ga interà tuto soto tera.
Ciò, ma quando che i ràdii e la television i ga tacà molar fora la notìssia, i bomberi e la polìssia i ze rivai là e no i ga catà pi gnente. Alora i ghe ga dimandà al fasendero:
– Onde zelo el avion che el ze caisto qua?
– Ah, par no veder quele brute robe, go fato un buso e go interà tuto soto tera.
– Si, ma zèreli tuti morti?
– Nò, ghen’era araquanti che i disea che i zera deputadi e questo e quel, che i se ramenea e i disea che i zera vivi. Ma mi go belche imparà che no da mia par creder cossa che i polìtichi i parla.
