– Compare Piero, dime na roba: ti che te sì sempre in cesa, che te scolti tute le prèdiche del vigário, crédito pròpio che Dio el ga tanto poder?
– Sicuro, comare. Te recòrdito mia che quando andàvino ntel catessismo, gavemo imparà che Dio el pol tuto?
– Ma ze belche diversi giorni che son drio pensar sora quel assunto li.
– Che assunto comare?
– El assunto che zèrino drio ciacolar. Par esémpio: se ze drio piover diverse stimane e se Dio el vol che la piova la se ferme de colpo, càtito che la se ferma?
– Sensa dúbio, comare. Se Dio el vol, el ga poder par mandar a piova fermarse de colpo.
– E se ghe ze na seca de tre, quatro mesi, càtito che, se Dio el vol, el manda la piova?
– Ma si, comare. Dio el ga el poder de far tuto nte la ora che el vol Lu.
– Anca se ghe ze na persona con una malatia che gnanca el canser, che la ze drio morir, crédito che, se Dio el vol, el pol mandarghe la cura a questa persona?
– Ma comare, te go belche dito che Dio el ga el poder de far tuto quel che el vol. Parché che te sì drio farme tute quele dimande lì?
– Alora assa che te conto na roba: càtito che mi son negra o bianca?
– Pamor de Dio, comare. Ti te si bianca che gnanca el late.
– E ti che te cognossi ben el me omo, che el ze to compare, dìsito che lu el ze negro o bianco?
– Sito drio deventar mata, comare. El to omo el ze sempre stato bianco, parché?
– Parché mi go un dúbio. Te vidi che son gràvida.
– Si che son drio veder.
– Alora mi te dimando na roba: se te me disi che Dio el pol tuto, sarà che el pol far che el me fioleto el vegne fora negro?
– Sicuro, comare. Se Dio el vol, el por far che el to fioleto el vegne fora negreto che gnanca un saco de carbono, sol che te pol prontate parché te vedarè la fila de bote che te ciaparè del to omo.
Sol par rider
Ghen era un talian che el gavea tre fiole e deromai l’era drio restar preocupà parché le tose le gavea passa via i vinti sìnque ani e no l’era bone de catarse fora un moroso.
Un giorno el ga savesto che ghen era un baile grando. El ga ciamà le fiole e el ghe ga dito cossita: incoi ve meno tute tre al baile la su ntel CTG Portela Verta, par veder se si bone de catarve fora un moroso par maridarve.
Dopo de fenio el baile, quando che i zera drio ndar casa cola camioneta, el pupà el ghe ga dito ala pi vècia:
– Go visto che te ghè balà squasi tuta la note col tosato dei ociai. Ghe gheto dimandà, mò, che profission chel ga?
– Nò, pupà, no ghe go mia dimandà la so profission, ma mi cato che el ze un dotor parché el me ga palpà da par tudo.
– E ti, fiola, – el ghe ga dimandà a la seconda, – quel che ga balà con ti, che profission galo?
– Ah, pupà, mi cato che el ze um mùsico, parchè cada poco el me invitea pa ndar là fora scoltar mùsica rento ntel so auto.
– E ti – el ghe ga dimandà ala ùltima – che moroso gheto catà fora?
– Ah, pupà, son restada pròpio apassionada.
– Si, ma ghe gheto dimandà onde che el laora?
– No ghe go mia dimandà, ma par la maniera e par el modo come che el me tegnea el ga de esser un ingegner parché el me misurea cole man par tuto el corpo.
21 de febraio gavemo comemorà El Giorno del Imigrante Italiano. Questa figura la conta na stòria che la ga depì de sento ani. Pena dopo che i imigranti i ga conseguio far la so produssion i ga scominsià a far la “marmelada”de fighi, de ua e de codogni e questo costume el continua fin el giorno de incoi.
No ghe ze na fameia dela colònia e anca de tante fameie dela cità che no le gàpie el so “tacho” par far la so marmelada o anca la zeleia.
Induvidela dela stimana
Cossa zela na roba che la ze fata par caminar e no la camina mia?
(Resposta: La rua)
