El giorno che la Dosolina la ze morta, tuti i ze restai rimirai, parchè l’era belche la tersa volta che Bepi el restea viuvo. El giorno drio del intero, Toni el se ga catà con Bepi el ghe ga parlà sora sto caso:
– Ciò, Bepi, come cossita, viuvo nantra volta?
– Èh, compare, far che… Se la ze la voia de Dio, bisogna rispetar.
– Ma dime na roba, Bepi: le done che te ghè perso, zele morte de la medèsima malatia, tute le tre?
– Nò, nò , caro. La prima, la Maria, ti no te la ghè gnanca cognossesta. La zera na fémena bona e tuto quanto, ma un pochetin massa cativa. La ga bevesto el velen, pora can.
– Ah!.. Vol dir che la Maria la ga bevesto el velen!? Mi no savea mia nò!…E la seconda?
La seconda, la Angèlica. La zera prestimosa, caprissiosa, laoradora che mai. Sol un pochetin massa cativa anca quela. E te sè che mi no me piase mia tanto de fémene massa cative. Ma, anca quela, poareta, la ga bevesto el velen.
– Ah!…La Angèlica la go cognossesta mi! Che fémena laoradora! Ma, e la Dosolina, quela che la ze morta geri?
– Ben, la Dosolina, la zera la meio de tute, sol che la zera la pi cativa de tute le tre.
– Ma gala bevesto el velen anca la Dosolina?
– Nò, nò, caro, la Dosolina, no sò se te la ghè vista ntel casson!? La ze morta cola testa tuta schiciada
– La go vista mi, ntel casson, ma no ga mia dato par veder polito, parchè la zera cola testa tuta infassada. Ma la gavea la testa schiciada par via de che?
– Parchè no la ga mia volesto bever el velen, porco cane!
Cossita la ze stata la stòria. Bepi no’l volea savèrghene de fémene cative, pò…
Sol par rider
El nono el ze ndà consultarse par portarghe i esami che el dotor el ghe gavea racomandà.
Dopo che el dotor el ga vardà i esami, el ghe ga dito al nono:
– I esami qua i ze tuti de acordo: colesterol basso, triglicerídeos un pochetin alti, glicose bona, feretina de acordo…
– Ah, si, dotor. Mi me sento come se gavesse disdoto ani ancora.
– Èh, se vede si qua ntei esami. E par via del sesso, come vala?
– Ben, par dir la verità, dotor, ntela, prima, sento tanto caldo. Ntela seconda, magari, me toca star soto le querte de tanto fredo.
– Come cossita, nono. Due volte?
– Si, dotor: la prima volta la fao ntel mese de genaro, ntel veron. E la seconda la fao in giugno, ntel inverno.
